《中佬唔易做》

六一年个阵，Ourson就响市歌做舞蹈演员了。但市歌净成立佐年零就解散了。由于市歌属于文化局。上头就问市歌啲人，选择调剂去边个单位。当时Ourson就话“我要去雕塑工作室”（雕塑院前身），点知雕塑工作室唔要佢。

冇耐，就文化大革命了。

当年逃港潮，其实好鬼牙烟，当时同批过去有两条艇仔，中间发生暴风雨，一条仲係度，一条沉咗大海，同一条艇嘅剧团演员好几个尾后都喂咗鲨鱼。佢哋用条命为自由投咗一票。

至于逃港嘅方式，有行路、有泅渡、有坐船。按路线，则有东线、中线、西线之别。由西线泅渡通常係首选。即从蛇口、红树林一带出发，游过深圳湾，顺利嘅话，大概个零钟就可以游到香港新界西北部嘅元朗。

旧时，香港人称武术演员为龙虎师傅。佢哋係香港电影产业中地位低下嘅走卒，无论係吊威亚、扮死尸、跳楼、跳车，最终不过係台词冇几句、甚至连名都上不到片尾字幕嘅“死跑龙套的”。Ourson靠住自己身手敏捷，响普通片场做茄喱啡一日可以稳百几蚊港纸，如果跟住当红姐仔哥仔同场个话，至少两旧水起，遇到要扮dead body个时好多人觉唔老礼，唔肯做，剧组会封翻个大利是比扮dead body嘅演员。有钱收喔，Ourson梗係有杀错冇放过啦！佢跟住成龙、洪金宝、李小龙等大佬一齐拍过唔少戏。当期时佢十零日人工等于普通OL成个月嘅粮。茄喱啡亦会有出头个一日，八几年拍咗港产动作恐怖喜剧片《人吓鬼》，又做编剧又做副导演仲要上场做埋戏。所以佢日子过得好和味。我哋笑佢稳甘多做乜？佢笑答“千间大屋半张床，日求三餐，夜求一督啊嘛”。养大成窦仔女，细女考上英国皇家音乐学院锯大提琴，掂过碌蔗。

睇耐佐演艺界嘅灯红酒绿，Ourson唔捞演艺界了，翻广州继续圆佢嘅雕塑梦。佢稳到隆罅跟住雕塑渣做大浮雕五羊仙。做做下个时，有条竹支架断咗，佢从几米高跌下来，落地前打个冇头关斗，落地一啲事都冇，我哋就吓到鼻哥隆都冇晒肉。佢帮演艺界某大哥做雕塑个时，企係一张榔係棚架度嘅旧凳仔上，太忘我亦或太激动了，凳仔突然跛咗只脚，佢又从高处跌落黎了。今次就冇甘好彩了，虽然食过几年夜粥，但石油副产品唔打算放过佢，有块凳脚残骸㓤咗入佢啰柚流到成裤都係血，好在冇乜太大伤害。真係人吓人，吓屎人啊……

工程收完数，Ourson请艺术渣齐哇哇去大排档食饭。佢随身孭住个大单肩包，里面一支金奖白兰地，仲有一大支饮料，饮料一早饮晒了，家阵当水壶用。吃饭前佢将台面个壶茶冚唪唥倒入佢嘅饮料樽度，话之你哋呢班嘢仲要唔要饮茶，后面加水啲茶都淡到冇晒茶味了。上菜之后，几杯傻仔水落肚，一路食一路弹，呢只鸡冇鸡味，条鱼又有泥味，碟青菜呢，菜又老火候又唔够……噼里啪啦一大轮，隔离台看院门口个高佬听到就唔抵得，鸡仔唔管管麻鹰，就话佢即使啲餸唔好食都唔应该甘样讲，你既然觉得唔好食就冇食……Ourson唔忿气，于是两条友开始开片了。高佬手长脚长，身材经已占咗优势，Ourson靠着身手敏捷亦唔输蚀，到最后逼到高佬使出一招撩阴腿，佢避得下盘唔记得护头，挨咗高佬两拳变咗熊猫眼，高佬受佢一拳飞鹤拳殴中肋骨受咗内伤。煲咗几个月中药，食到嘴唇黑到成个心脏病患者甘。呢围真係番薯跌落灶，该煨了！